Pangungunahan nina Jericho Rosales at Yen Santos ang teleseryeng “Halik,” kung saan tampok ang mapusok na kuwento ng wagas na pagmamahalang susubukin ng panahon at ng tukso. Mapapanood na ito simula sa Agosto 13, Lunes sa Primetime Bida sa ABS-CBN.
Kasamang bibida sa programa sina Sam Milby at Yam Concepcion bilang mga kabiyak na hindi mapagkakatiwalaang tuparin ang mga pinangako sa kasal sa kani-kanilang mga asawa.
Sentro sa kuwento ang naudlot na pagmahahalan nina Lino (Jericho) at Jacky (Yen) na mula pagkabata ay may pagtingin na para sa isa’t-isa. Tututulan ng mga magulang ni Jacky ang kanilang relasyon dahil hindi nila ka-estado ang pamilya ng binata, at si Lino na mismo ang lalayo para hindi na lalong masaktan si Jacky.
Makalipas ang ilang taon ay pagtatagpuin silang muli ng tadhana ngunit parehas na silang kasal sa iba, si Lino kay Jade (Yam), isang babaeng mataas ang ambisyon at hindi basta-basta sumusuko sa kaniyang mga gusto. Si Jacky naman ay kasal kay Ace (Sam), isang mayamang lalaki na bagamat malambing ay may sikretong nililihim.
Sa kanilang muling pagkikita ay susubukan nilang tuparin ang mga pangakong binitawan sa kanilang mga asawa at lalabanan ang mga emosyong hindi nawala sa kanilang mga puso. Ngunit ano nga ba ang magiging mas matimbang ang wagas na unang pag-ibig o ang sinumpaang hindi magpadala sa tukso?
Kukumpleto sa palabang cast ng “Halik” ang ilan sa pinakamagaling na beterano at baguhang artista sa bansa kabilang sina Amy Austria, Alan Paule, Precious Lara Quigaman, Romnick Sarmenta, Cris Villanueva, Almira Muhlach, Christian Bables, Hero Angeles, Chai Fonacier, JC Alcantara, Jane De Leon, at Gab Lagman. Sina Cathy Camarillo at Carlo Po Artillaga ang mga direktor ng programa, na nasa ilalim ng business unit na pinamamahalaan ni Ruel Bayani.
Huwag kalimutang panoorin ang “Halik” gabi-gabi, sa Primetime Bida sa ABS-CBN pagkatapos ng “Bagani” simula sa Agosto 13, Lunes.
0 Comments